Në varrezat e qytetit të Prizrenit është varrosur sot dramaturgu, gazetari, arsimtari i gjuhës rome dhe drejtori i Radios “Romano Avazo”, Nexhip Menekshe.
Menekshe ndërroi jetë pas një sëmundje të shkurtë.
Kryetari i Prizrenit, Mytaher Haskuka tha se Menekshe do t’i mungojë Prizrenit.
“Një qytetar aktiv dhe aktivist i pashoq për të drejtat e romëve.Ai do t’i mungojë Prizrenit dhe sidomos komunitetit rom në Prizren dhe Kosovë”, tha Haskuka.
Menekshe kohë më parë realizoi dramën “Na ishte se ç’na ishte një Kujtim Paçak”, nën regjinë e Kaltrim Balajt, e cila u shfaq në muajin prill në Shtëpinë e Kulturës “Xhemajli Berisha” në Prizren
Fatmir Menekshe ka pasur barrën kryesore në këtë shfaqje, në rolin e Kujtim Paçakut.
Shfaqja u trajtua me anë të fragmenteve nga jeta e Kujtim Paçakut.
Shumica e lojërave skenike ishin të bazuara në fragmente të punës së intelektuale të Paçakut, si fuqi njerëzore e liderit, e tolerancës, e drejtësisë dhe më shumë e kreativitetit, që i lartëson poezitë e shkruara të tij./PrizrenPress.com/