Kryetari i LDK-së në Prizren, Anton Quni, ka përkujtuar Ekrem Rexhën, në 21 vjetorin e vrasjes.
Ai, bashkë me bashkëpunëtorët e tij, ka bërë homazhe tek varri i tij.
“Njëzetenjë vjet pas vrasjes makabre të Ekrem Rexhës – komandant Drinit – familja, kolegët e bashkëluftëtarët janë në pritje të gjetjes së urdhërdhënësve dhe vrasësve të tij, në mënyrë që drejtësia të vihet në vend, se vetëm atëherë liria merr kuptimin e plotë të saj”, tha Quni.
“Komandant ‘Drini’ njihej si strateg lufte, idealist e vizionar që kishte ide e plane pa fund se si te zhvillohet Prizreni e Kosova”.
“Ai ishte njeri modest, i afërt e i respektuar nga të gjithë. Vrasja makabre e tij i shkaktoi humbje të madhe vendit tonë, zbrazëti e pikëllim të madh familjes, bashkëluftëtarëve dhe të gjithë atyre që e njohën”.