Presidenti i Turqisë, Rexhep Erdogan, ka thënë se Suedia nuk duhet ta presë përkrahjen e Turqisë për anëtarësimin në NATO. Deklarata e presidentit turk erdhi pak ditë pas djegies së një kopjeje të Kuranit në një protestë në Stokholm.
“Suedia nuk duhet të presë përkrahje nga ne për NATO. Është e qartë se ata që ata që kanë shkaktuar një turpërim të tillë përballë ambasadës së vendit tonë, nuk mund të presin më asnjë dashamirësi nga ne sa i përket aplikimit të tyre”- tha Erdogani.
Për mbajtjen e protestës të shtunën – por jo për djegien e Kuranit – autoritetet suedeze kishin dhënë leje paraprake.
Presidenti turk e dënoi protestën e fundit, të mbajtur nga një politikan i së djathtës ekstreme, i cili është anëtar i një partie daneze, duke e cilësuar blasfemi që nuk duhet të mbrohet nga liria e të shprehurit.
Edhe qeveria suedeze e ka dënuar protestën e fundit. “Suedia ka liri të gjerë të të shprehurit, por kjo nuk nënkupton që qeveria suedeze ose unë i përkrahin opinionet e shprehura”- tha të shtunën ministri i Punëve të Jashtme i Suedisë, Tobias Billstrom.
“Suedia do ta respektojë marrëveshjen që ekziston mes Suedisë, Finlandës dhe Turqisë sa i përket anëtarësimit tonë në NATO”- shtoi ai.