Në Gjykatën Themelore në Prizren, të martën, për shkak mungesës së gjykatëses, Vjollca Buzhala, është anuluar gjykimi ndaj Kompanisë Kosovare për Distribuim dhe Furnizim me Energji Elektrike- KEDS Sh.A dhe Qemal Mehmeti, të cilët po akuzohen se si pasojë e moskujdesjes për linjën elektrike dhe elementeve të saj të tensionit 10 KW, ka vdekur tani i ndjeri I.O.
Lajmin për anulimin e kësaj seance “Betimi për Drejtësi” e ka konfirmuar zyra e gjykatëses Buzhala.
Ndërsa, përfaqësuesi i të dëmtuarës M.O, avokati Blerim Mazreku dhe mbrojtësi i të akuzuarit Mehmeti, avokati Hazër Susuri për “Betimi për Drejtësi” thanë se nuk janë njoftuar për anulimin kësaj seance.
Ndryshe, Prokuroria Themelore në Prizren, më 5 mars 2019 ka ngritur aktakuzë ndaj personit juridik, Kompanisë Kosovare për Distribuim dhe Furnizim me Energji Elektrike- KEDS Sh.A, si dhe Qemal Mehmetit, si përgjegjës i personit juridik, për veprën penale “Asgjësimi, dëmtimi apo heqja e instalimeve publike”.
Në aktakuzë thuhet se i pandehuri KEDS, si person juridik më 29 tetor 2018 si pasojë e moskujdesjes së linjës elektrike dhe elementeve të saj të tensionit 10 KË, ka vdiq tani i ndjeri I.O nga teli i këputur prej tensionit të lartë.
Po ashtu, në aktakuzën e Prokurorisë thuhet se i pandehuri Qemal Mehmeti në kuadër të autorizimeve për të vepruar në emër të personit juridik, si përgjegjës i rrjetit nën distriktin 10 KË në pjesën e fshatit Struzhë, nuk ka vepruar në pajisjet për instalimet, mbrojtësit e përçuesve elektrik, me ç’rast ka ardhur deri tek këputja e telit, i cili ka rënë në tokë ku ka gjetur vdekjen tani i ndjeri I.O.
Me këtë, akuzohen se kanë kryer veprën penale “Asgjësimi, dëmtimi ose heqja e instalimeve publike”. /BetimipërDrejtësi
