Libri historik “Gjurmë të Postës në trojet shqiptare 1800-1944” i studiuesit Fadil Smajlaj nga Shkodra u promovua edhe në Prizren.
Në promovim ishin të pranishëm përfaqësues nga Posta e Kosovës në Prizren dhe dashamirës të librit.
Redaktorja Liliana Konomi-Mero e ka vlerësuar lart botimin e këtij libri.
Ajo tha se ky libër dokumenton ngjarje historike dhe politike përgjatë 150 viteve në trojet shqiptare.
“Libri është i shkruar me një gjuhë të thjeshtë dhe në aspektin letrar, ku përshkruhet historia e Postës Shqiptare në periudha të ndryshme”, tha Konomi-Mero.
Zyrtari i Postës së Kosovës në Prizren, Rexhep Morina, tha se autori i librit Fadil Smajlaj ka dhënë një kontribut të madh jo vetëm në zhvillimin e Postës Shqiptare dhe të Kosovës, por edhe në çështjen kombëtare.
“Baca Fadil ka dhënë një kontribut të madh për kombin shqiptar. Ai, gjatë luftës në Kosovë, ka pritur e përcjellur luftëtarë të UÇK-së”, tha Morina, i cili ishte edhe njëri ndër organizatorët e promovimit të librit.
Ndërkaq, në emër të Postës së Kosovës – regjioni i Prizrenit, Etrit Hoti e ka përgëzuar autorin Fadil Smajlaj, për botimin e këtij libri.
Smajlaj ka shërbyer për 35 vjet në poste të larta drejtuese pranë Postës Shqiptare.
Nëpërmjet këtij libri, Smajlaj pasuron më tej dijen dhe historiografinë e Postës në të gjithë hapësirën ku kanë jetuar e jetojnë shqiptarët.
Me një përvojë të gjatë në fushën e shërbimeve postare, Fadil Smajlaj ofron në këtë libër një analizë të thellë me dëshmi nga periudha të ndryshme të evolucionit të sistemit postar.
Ky libër është një kontribut i rëndësishëm në studimin e historisë shqiptare, që na kujton se shërbimet postare janë më shumë se thjesht një mënyrë për të dërguar letra.
Studjuesi Fadil Smajlaj, me mbarimin e luftës në Kosovë, ofrohet vullnetarisht pranë Postës dhe Telekomit të Kosovës, si ndihmës i Drejtorit të Përgjithshëm të PTK-së për riorganizimin e shërbimeve postare.
Ai punoi për riorganizimin e shërbimit postar në Kosovë, i shkëputur krejtësisht nga shërbimet postare të ish-Jugosllavisë. Më 15 mars të vitit 2000 emetohet pulla e parë postare e Kosovës nën siglën e UNMIK-ut.
Smajlaj punoi intensivisht për realizimin e shërbimit postar ndërkombëtar në Kosovë. Ky shërbim u realizua më 31 maj të vitit 2000.
Libri u promovua në përkujdesjen e Shoqatës për Kulturë dhe Art “Fidani” në Prizren./PrizrenPress.com/