Anëtari i Gjykatës Kushtetuese të Kosovës, Kadri Kryeziu është kandidati më serioz për të marrë drejtimin e Universitetit të Prizrenit “Ukshin Hoti”. Kështu kanë bërë të ditur për Gazetën Blic burime të afërta me procesin e përzgjedhjes së rektorit të ri.
Sipas këtyre burimeve, Kryeziu e ka mbështetjen e fuqishme të lidershipit të PDK-së.
“Kadri Kryeziu ka një mbështetje të fuqishme të lidershipit të PDK-së, sidomos të kryeministrit Hashim Thaçi, prandaj edhe i ka gjasat më të mëdha”, ka thënë ky burim.
Sipas këtij burimi, gjasa të mira ka edhe ish- deputeti i PDK-së, Ramë Vataj, mirëpo për shkak se ky është anëtarë i partisë, nuk ka edhe shumë mbështetje. “Ramë Vatajt i është thënë që të mos kandidoj sepse do të jetë e vështirë që ai të zgjedhet rektor për shkak se është anëtarë i PDK-së”, ka thënë ky burim.
Ndryshe, Kadri Kryeziu ishte parë edhe në fushatën e fundit elektorale të PDK-së, çka bëri pastaj që ky i fundit të mos jetë pjesë e vendimeve të Gjykatës Kushtetuese për çështjen e asaj se kujt i takon mandati për formimin e qeverisë dhe për çështjen e zgjedhjes së kryeparlamentarit.
Pos tyre, në garë për të parin e UPZ-së janë edhe: Lirak Karjagdiu, Isuf Musliu, Gani Gjini, Florije Govori-Fejzullahu, Fahredin Shabani dhe Nagip Skenderi, i cili një kohë ishte edhe sekretar i përgjithshëm në Ministrinë e Punëve të Jashtme.
Të hënën e ardhshme pritet që të intervistohen të gjithë kandidatët që kanë aplikuar për të parin e UPZ-së, në mënyrë që pastaj Këshilli Drejtues të vendos për kandidatin më të mirë.
Kështu ka bërë të ditur për Gazetën Blic, zëdhënësi i UPZ-së, Ramadan Baraliu.
“Zgjedhja e rektorit të Universitetit do të bëhet në bazë të dinamikës së përcaktuar nga ana e Këshillit Drejtues të Universitetit. Senati e ka caktuar një Komision profesional që do të merret me shqyrtimin e aplikacioneve dhe do të paraqet një raport në Këshillin Drejtues. Këshilli Drejtues më 15.09.2014 pritët të bënë intervistimin e kandidatëve që do të futen në listën e ngushtë dhe do të vendos për zgjedhjen e rektorit të Universitetit për mandatin e ardhshëm”, ka thënë ai për Gazetën Blic.
Ndryshe Universiteti i Prizrenit, “Ukshin Hoti” tash e sa muaj është me ushtrues detyre të rektorit për faktin se Mazllum Baraliu kishte dhënë dorëheqje, për shkak menaxhmenti i UP-së të gjithë profesorëve u kishte kërkuar që të zgjedhnin, që ose të mbesin profesor në UP ose të mbanin pozitat udhëheqëse.