Autoritetet komunale të Rahovecit kërkojnë kryerjen e obligimeve ndaj shtetit. Ata janë të vendosur t`i ndëshkojnë këshilltarët komunalë, të cilët nuk i kanë shlyer obligimet e tatimit në pronë.
Këtë e ka paralajmëruar drejtori i Buxhetit…, Lulzim Sylejmani, në një seancë të KK-së. Sylejmani ua ka bërë të qartë këshilltarëve të KK-së dhe drejtorëve komunalë të Ekzekutivit se nëse deri në mbledhjen e radhës të KK-së nuk i shlyejnë borxhet për tatimin në pronë, Komuna është e detyruar ta bëjë publikimin e emrave të këshilltarëve borxhlinj, shkruan Koha Ditore.
Nga ana tjetër, disa këshilltarë dhe shoqëria civile janë shprehur krejt ndryshe lidhur me këtë kërcënim të drejtorit të arkës komunale.
Për këshilltarin e LDK-së në KK, Selim Duraku, ky është një lloj kërcënimi i Sylejmanit, sidomos për ata nga Krusha e Madhe, nga është edhe vetë ai. Sipas tij, pas Rahovecit ky fshat është zona e dytë kadastrale që mbush arkën komunale nga të hyrat vetjake, me gjithë faktin se këtë vit nuk është bërë asnjë investim kapital në infrastrukturën e Krushës.
Këshilltari opozitar nga AAK-ja, Përparim Krasniqi, pasi thotë të ketë kryer obligimin e tatimit në pronë, ka shtuar se do të ishte mirë që për shkak të transparencës të bëhen publike borxhlinjtë e drejtorëve komunalë dhe të vazhdojë edhe me të tjerët.