Avokati Arianit Koci brenda një ore do të dorëzojë ankesën kundër paraburgimit të Donika Kadaj-Bujupit.
KALLXO.com e ka siguruar ankesën që Koci do ta dorëzojë në Gjykatën Themelore të Prishtinës me kërkesë që ajo t’i shkojë Gjykatës së Apelit.
Koci në ankesë e quan të padrejtë vendimin për paraburgimin e Donika Kadaj-Bujupit.
“Ky vendim nuk ka qenë as i drejtë as i ligjshëm, e as proporcional. Prandaj ky vendim as nuk ka ndikuar në forcimin e zbatimit të ligjshmërisë e as në qetësimin e situatës politike. Gjykata ka pasur hapësirë juridike ta marrë ndonjë vendim tjetër,” tha Koci.
Ai në ankesë rendit edhe elemente tjera me të cilat konteston vendimin.
“Vendimi i gjykatës për caktimin e masës së paraburgimit përmban të meta të shumta. Gjykata bën formulime të standardizuara dhe stereotipe duke mos iu referuar fakteve të veçanta të lëndës. Asnjë nga pretendimet e mbrojtjes nuk është trajtuar në arsyetim të këtij vendimi,” thuhet në ankesën e avokatit Koci.
Deputetes së AAK-së iu caktua të mërkurën masa e paraburgimit prej 30 ditësh, ndërsa avokati Koci nuk e di se në cilën qendër paraburgimi ndodhet Kadaj-Bujupi, por supozon se ajo duhet të jetë në Lipjan.
Koci thotë se në kërkesën e prokurorisë për caktimin e paraburgimit nuk është bërë ekspertiza për tymin në seancë.
Po ashtu në ankesën e Kocit thuhet se mbrojtja ka argumentuar se kualifikimi juridik i veprës penale është I gabuar.
“Prokuroria nuk ka arritur të argumentojë se ekziston dyshimi i bazuar për kryerjen e veprës penale,” sqaron ankesa.
Në ankesë Koci thotë se nuk janë marrë parasysh nga gjykata pretendimet e mbrojtjes lidhur me imunitetin, ndërsa ia zë për të madhe gjykatës se në arsyetimin e vendimit të saj përmend edhe rrezikun e ikjes, një gjë të cilën sipas Kocit nuk e bën as prokuroria. /Kallxo.com