Në emisionin “Puls” të KTV-së u zhvillua debat i ashpër mes pozitës dhe opozitës. Në debat, edhe anëtarët e komisionit për integrime nuk u pajtuan se janë plotësuar kriteret për liberalizim as për projektligjin për përgjime elektronike e as për koalicionin qeverisës.
Teuta Sahatqija, deputete e LDK-së, e ftuar në emision, tha se integrimet evropiane nuk kanë të bëjnë më kritere duke e ditur se as Rumania, as Shqipëria dhe as Bullgaria nuk i kanë plotësuar kriteret dhe u janë liberalizuar vizat.
“Duhet shumë shpejt të rikthehet projektligji për përgjime elektronike, të ndryshohet dhe të votohet sa më shpejt. Ju opozita veç zi po shihni, po e quani Kosovën tmerr. Kjo është e keqe çka thoni nuk është e vërtetë se është tmerr të jetosh në Kosovë”, tha Sahatqija, raporton Koha.net.
I ftuari tjetër në debat, Ilir Deda nga Vetëvendosje, tha se ne askund nuk jemi me plotësimin e kritereve, as politike e as teknike, me këtë nivel të korrupsionit, krimit të organizuar dhe mosplotësimi kritereve siç janë dokumentet e regjistrimit civil e shumë gjëra tjera.
“Shikoni si ikin qytetarët nga jeta e tmerrshme qe 15 vjet pa perspektivë. Mos ja leni qytetarëve fajin për liberalizim sepse këta po ikin për shkak të gjendjes së mjerimit. Projektligji për përgjime elektronike është një projektligj i sistemeve totalitare e ne si komision nuk do ta lejojmë këtë ligj, do ta kthejmë nëse nuk ndryshohet çdo herë që vjen”, ka thënë Deda.
Ndërkaq, Valdete Bajrami, deputete e NISMA për Kosovën, tha se qytetarët filluan të ikin pasi u bë koalicioni PDK dhe LDK sepse e panë se nuk ka shpresë për këtë vend.
“Sa i përket kritereve, qeveria jonë nuk ka bërë asgjë. Tash bile i kam dëgjuar edhe pushtetarët duke thënë se këta që po ikin janë votues të opozitës. Unë i kam dëgjuar në parlament”, ka theksuar ajo.
Luljeta Veseli Gutaj – deputete e PDK-së, shtoi se qeveria e Kosovës ka punuar shumë për procesin e integrimeve dhe të njohjeve dhe sipas saj, kjo punë nuk mund të mohohet.
“Qytetarët nuk po ikin sepse ekonomia jonë është më e dobët ose më keq se Maqedonia, Shqipëria etj”, tha ajo.