Këngëtari amerikan, Bob Dylan, ka fituar Çmimin Nobel për Letërsi.
“Çmimi Nobel për Letërsi për vitin 2016 i ndahet Bob Dylanit, për krijimin e shprehjeve të reja poetike në traditën e bukur të këngës amerikane”, ka thënë Sara Danius, Sekretare e Përhershme e Akademisë Suedeze, teksa shpalli fituesin në Stokholm.
Dylan, 75 vjeç, ka nisur karrierën muzikore në vitin 1959, në kafenetë e Minesotës.
Vitet ‘60 sjellin bumin e krijimtarisë së tij, një shkëlqim që erdhi bashkë me shndërrimin e këtij njeriu të madh në një historian informal të telasheve të Amerikës.
Këngët e tij si “Blowin’ in the Wind” janë bërë himne të anti-luftës dhe lëvizjeve për të drejtat civile në Shtetet e Bashkuara.
Vitin e kaluar, Nobeli për Letërsi i është dhënë shkrimtares bjelloruse, Svetlana Aleksievich, për shkrimet e saj mbi tragjeditë e Bjellorusisë gjatë shekullit 20.
Nobelin e shumëpritur të Letërsisë këtë vit e rrëmbeu një njeri emri i të cilit veshët tanë nuk i ka rrahur si shkrimtar, por si një legjendë e rokut. Por, Bob Dylan ka qenë për më shumë se 5 dekada një influence e jashtëzakonshme në muzikën dhe në kulturën popullore, jo vetëm me notat muzikore, por edhe me penën e tij.
Çmimi i lakmuar i dorëzohet pikërisht me këtë argument: krijimin e frazave të reja poetike brenda traditës madhështore të këngës amerikane.