T’i lejoheshin studimet universitare nga burgu, ishte kushti që Mithat Llozhani ua kishte vënë Shërbimit Korrektues të Dubravës dhe Ministrisë së Drejtësisë në shkëmbim të qetësimit të të burgosurve dhe ndaljes së grevave.
Ndonëse ishte i dënuar për vrasjen e 21-vjeçarit, Llozhani si një nga udhëheqësit e grevave brenda në burg, është privilegjuar me të drejtën e studimeve, shkruan Koha Ditore.
Daljet nga burgu kanë qenë në shumicën e rasteve pa shoqërues. Shpenzimet e rrugës Dubravë-Prishtinë i ka mbuluar burgu. Nuk ka paguar asnjë cent për studime, falë mbështetjes së Organizatës së Veteranëve të Luftës (OVL).
Kështu së paku pretendon Mithat Llozhani, i cili ka kaluar 11 vjet në burg, i dënuar për vrasje.
Ai ka rrëfyer për gazetën se si me shantazhe i kishte “detyruar” zyrtarët e burgut që t’ia lejonin, sipas tij, këtë të drejtë.
Në kohën kur ka qenë i burgosur Llozhani ka ndjekur studimet në kolegjin ‘Globus’.
Megjithatë i pyet nga gazeta, Ministri i Drejtësisë, Hajredin Kuçi, nuk ka pranuar të përgjigjej se nëse një i burgosur lejohet ose jo që gjatë kohës së vuajtjes së dënimit të ndjek studimet.
“Unë nuk merrem me këto çështje, është Shërbimi Korrektues i cili vendos çdo gjë për të burgosurit”, është shprehur Kuçi. /Koha Ditore/