Burime të gazetës botapress nga dy partitë e bllokut, LDK e AAK nuk e kanë mohuar faktin se PDK po dërgon “mesazhe” dhe “oferta” ndaj disa prej deputetëve të këtyre partive politike për të siguruar votat për krijimin e bashkëqeverisjes me PDK-në.
Partia Demokratike e Kosovës nuk e ka ndërmend të heq dorë nga ruajtja e pushtetit, pavarësisht vendimit të Gjykatës Supreme.
Zyrtarë të kësaj partie, deputetë dhe aktivistë të niveleve të ndryshme janë duke shfrytëzuar të gjitha format e komunikimit me deputetë të bllokut LDK-AAK-Nisma, si dhe të minoritetit jo serb për të siguruar shumicën parlamentare në Kuvendin e Kosovës.
Poste ministrore, drejtues bordesh të koorporatave, pozita diplomatike për familjarët dhe të afërmit e
deputetëve janë disa prej ofertave që PDK i ka hedhur “në tregun politik“ të Kosovës.
“Po, ofertat janë të majme, por deri më tash asgjë nuk është konkrete. Po presim vendimin e Gjykatës…“ i kanë thënë botapress-it zyrtarë të Bllokut.
Sipas këtyre burimeve, janë së paku 10 deputetë të Bllokut që janë në “shënjestër” të PDK-së për të siguruar votat e tyre për formimin e qeverisë të udhëhequr nga PDK-ja.
Deputetët e “shënjestuar” nga PDK-ja janë kryesisht të pakënaqurit me koalicionin e Bllokut si dhe ish-bashkëluftëtarë të kohës së luftës të cilët gjejnë siguri dhe mbrojtje më të madhe te PDK-ja se sa te Blloku në rast të ngritjes eventuale të akuzave për krime lufte nga Gjykata Speciale që pritet të fillojë funksionimin në fillim të vitit të ardhshëm.
Vendimi i Gjykatës Speciale pritet të shpallet më së largu më 22 gusht, ndërkaq më pas do të jetë përsëri Kuvendi i Kosovës “arenë” e zhvillimeve politike që do t’i hapë udhë ndërtimit të institucioneve të vendit.