CNN ka siguruar video të asaj që tani po hetohet si një krim lufte nga prokurorët ukrainas.
Të dy civilët vdiqën pas të shtënave të pashpirt, që bien ndesh me të ashtuquajturat rregulla të luftës të cilat ndalojnë shenjëstrimin e civilëve.
Sipas CNN që raporton se ka identifikuar viktimat, njëri ishte pronari i lokalit të shitjes së automjeteve, familja e të cilit nuk dëshiroi që emri i tij të bëhet publik, ndërsa tjetri ishte Leonid Oleksiyovych Plyats, një gjysh 68-vjeçar që punonte si roje atje.
Vajza e këtij të fundit, Julia, nuk mundi të durojë që ta shikojë videon e ditës së vdekjes së babait të saj, por po e ruan që një ditë t’ua tregojë fëmijëve të saj, që të mos harrojnë se sa të egër ishin pushtuesit.
“Ata janë xhelatët”, tha ajo për CNN. “Është e tmerrshme sepse babai im ishte një civil, ai ishte 68 vjeç, një njeri paqësor i paarmatosur”.
