Avokati Mexhid Syla vazhdon të jetë i bindur se akuzat ndaj kryeparlametarit Jakup Krasniqi për krime lufte, janë plotësisht të pabaza. Dhe si të tilla nuk paraqesin prova të mjaftueshme për të vazhduar hetimet.
Ish- zëdhënësi i UK’së është marrë në pyetje nga hetues të EULEX para pak ditësh nën dyshimin se ka shkelur kodet e luftës gjatë viteve 1998-1999.
Sipas avokatit Syla ai është marrë në pyetje duke u bazuar në deklaratat e dy dëshmitareve, argumentet e të cilave janë krejtësisht të pabaza.
Në dëshminë e tyre prej 6 faqesh emri i Krasniqit përmendet veç në një rresht, në të cilin dëshmitarja e përshkruan një person me mjekër të paraqitur si Jakup Krasniqi.
Njëri dëshmitar thotë se ky person ia ka rruar flokët, derisa personi tjetër ka deklaruar se i është thënë shkoni e i thoni shkijeve se jam Jakup Krasniqi. “Krasniqi nuk ka pas kurrë mjekër. Dhe në atë kohë ka pas shumë foto e incizime të cilat e paraqesin atë pa mjekër”, ka thënë Syla për Zërin.