Njëri nga themeluesit e Lidhjes Demokratike të Kosovës, Eqrem Kryeziu, ka thënë se duartrokitjet e delegatëve për Isa Mustafën, ishin duartrokitje për një lider të dështuar.
Ai këto komente i ka bërë në llogarinë e tij në Facebook, përderisa e ka quajtur Kuvendin e sotëm të Lidhjes Demokratike, parodi.
“Pati duartrokitje frenetike e ovacione e unanimitet kur zgjodhëm liderin, ani pse i dështuar. Ende mund të shohim në filma dokumentarë sesi turmat në stallat e mëdha gjithandej Shqipërisë komuniste duartrokitnin me entuziazëm histerik kur shpallej vendimi “me vdekje” për njerëz që nuk i mësonin dot përmendsh as tekstet që do t’i dërgonin në vdekje të pashmangshme”.
“Isa delegatët i trajton si të pambrojtur, të papjekur dhe infantilë. Pa paternalizmin e liderit ata nuk jetojnë dot”, ka shkruar Kryeziu në Facebook.
Ja postimi i plotë i Eqrem Kryeziut në Facebook:
Sikur të mos mjaftonte transformimi në parodi i Kuvendit VIII Zgjedhor të LDK-së, kemi dhe plot perla që fitimtarët i shkapërderdhën për ne të vdekshmit.
Perla e parë: U kërkon falje Isa delegatëve për trysninë që kanë pësuar ditëve të fundit. Ja, ç’baba i kujdesshëm për çiliminjtë ende të papjekur. Në një rast frymëzimi, duke folë për veçoritë e LDK-së, madje isha para dy akademikëve të këtij subjekti, thashë: “…kurse Lidhja Demokratike e Kosovës është bashkim i njerëzve të lirë.” Por, paskam qenë budalla: Isa i trajton si të pambrojtur, të papjekur dhe infantilë. Pa paternalizmin e liderit ata nuk jetojnë dot. Dhe kjo pikëpamje fitoi sot.
Perla e dytë: Pati duartrokitje frenetike e ovacione e unanimitet kur zgjodhëm liderin, ani pse i dështuar.
Ende mund të shohim në filma dokumentarë sesi turmat në sallat e në stallat e mëdha gjithandej Shqipërisë komuniste, duartrokitnin me entuziazëm histerik kur shpallej vendimi “me vdekje” për njerëz që nuk i mësonin dot përmendsh as tekstet që do t’i dërgonin në vdekje të pashmangshme.
Por pse duartrokitjet?
Ato ishin gëzimi parak i qenies biologjike njerëzore se e liga e kaloi duartrokitësin. Pasqua! Derisa duartroket, madje shumë, shumë fort, gjer në dhembje, kjo do të thotë se je ende gjallë.
Ja, ç’mesazh na dërgon duartrokitja jonë vetes sonë: Pasqua! E liga të anashkaloi edhe kësaj here.
Por, kujdes! Syri i lig të vështron! Mund ta pësosh herën tjetër, madje edhe në çastin tjetër.