Kryetari i Komunës së Prizrenit Mytaher Haskuka së bashku me drejtorin e Caritasit Zviceran, Gerhard Schaumberger dhe drejtoreshën e Zyrës Koordinuese për Bashkëpunim Zhvillimor të Austrisë në Prishtinë (ADA), Sandra Horina, kanë bërë shpërndarjen e materialeve për kultivimin e bimëve manore për fermerët e rajonit të Zhupës, që kanë përfituar nga projekti SIRED (Zhvillimi i Qëndrueshëm dhe Gjithëpërfshirës Ekonomik Rural).
Në kudër të këtij projekti, i cili është bashkëfinancim i Komunës së Prizrenit dhe Caritasit Zviceran, gjithsej 14 fermerë të rajonit të Zhupës, sivjet kanë përfituar materiale për kultivimin e bimëve manore, të cilët do t’i mbjellin në një hapësirë rreth 1.5 hektarë.
Me këtë rast kryetari Haskuka deklaroi se bimët manore aktualisht janë një nga llojet e bimëve më të kërkuara nga tregu ndërkombëtar. Në këtë aspekt, ky projekt përveçse do të rrisë të ardhurat e familjeve të fermerëve, po ashtu do të ndikojë edhe në zhvillimin e përgjithshëm të komunës së Prizrenit.
Së fundmi, kryetari Haskuka falënderoi Caritasin Zviceran dhe ADA-n për bashkëpunim e tyre me Komunën e Prizrenit dhe për mbështetjen e fermerëve.
