Është ky edicioni i katërt i Festivalit të Letërsisë në Orllan- FLO, i cili edhe sivjet vazhdon traditën buzë liqenit me poezi, me këngë folk e blues.
Dita e enjte ishte ajo që mblodhi poetë, shkrimtarë, muzikantë, artistë dhe adhurues të kulturës, të cilët ishin në masë të madhe nga të gjitha trojet shqiptare dhe më larg. Festivali tanimë tradicional nisi me pamje që përmbledhnin atë që ndodhi vitin e kaluar, ndërsa u hap me ndarjen e çmimit “Ramiz Kelmendi”, e që sivjet i shkoi laureatit Sokrat Shyti.
“Mendoj se ky takim i mrekullushëm u jep mundësinë shumë talenteve të reja që të dalin e të lexojnë poezitë e tyre. Shumë prej tyre nuk kanë mundësi as të botohen dhe një organizim si ky veç sa i mbledh poetët më të mirë” ka pohuar Shyti.
Pas ndarjes së çmimit, FLO vazhdoi me leximin e poezive të poetëve të njohur shqiptarë, poezi këto që krijuan vëmendje tek të pranishmit. Ishin poezitë e Xhevahir Spahiut ato që hapën festivalin, për të vazhduar me Primo Shllakun, Ledia Dushin e të tjerë.
Poeti Adem Gashi tha për KultPlus se këtë vit e ndjen veten më shumë si mysafir nderi, sepse ai është edhe një ndër themeluesit e këtij festivali bashkë me profesor Kelmendin.
“Ideja e këtij festivali është në bashkëpunim edhe me profesorin Ramiz Kelmendi. Ne e kemi themeluar këtë festival dhe jemi marrë vesh që ky festival të jetë tradicional. Zakonisht lindjet e para priten me dyshime dhe se si do të ecim tutje, por festivali po rritet e zgjerohet përtej parashikimeve tona” pohon Gashi.
“Deri tash janë lexuar edhe poezitë e mia por këtë vit e ndjej veten si mysafir nderi. E mira e këtij festivali është që çdo vit po dalin krijues të rinj dhe po takojmë breza të ndryshëm të poetëve” tha Gashi.
Në festivalin i cili vazhdon edhe me dy netë të tjera vijnë edhe emra si Ndriçim Ademaj, Ervina Halili, Alma Panajoti, Imer Topanica, Eva Hila e të tjerë. / KultPlus.com