“Nuk e di se çfarë ndodhi, isha i bindur që e kisha lënë vajzën në çerdhe”. Kështu është shprehur babai i vajzës 14-muajshe të gjetur pa jetë brenda makinës së tij gjatë marrjes në pyetje të kryer para hetuesve.
Mediat italiane bëjnë të ditur se karabinieri 45-vjeçar italian është nën hetim për braktisje të të miturve.
Vajza 14-muajshe u gjet dje e pajetë në sediljen e pasme të një makine në zonën Cecchignola të Romës, e harruar nga babai i saj, i cili duhej ta çonte në çerdhe.
Sipas hetuesve, babai i saj kishte harruar ta çonte në çerdhen e fëmijëve që ndodhet disa dhjetëra metra larg zyrës së tij. Makina është e sekuestruar, ndërkohë që hetuesit do të duhet të kryejnë një sërë kontrollesh në mjet për të sqaruar saktësisht se çfarë ka ndodhur.
Mëngjesin e djeshëm, sipas rikonstruksioneve të para të asaj që ndodhi, babai i foshnjës, një karabinier në detyrë në Shtabin e Përgjithshëm të Mbrojtjes, duhet ta kishte shoqëruar vajzën e tij në çerdhe, ndërsa nëna duhet ta kishte marrë përsëri pasdite. Por pas mbërritjes së gruas, edukatoret i shpjeguan se vajza e saj nuk kishte ardhur kurrë në shkollë. Kur gruaja pa makinën e burrit të saj me foshnjën brenda, u frikësua dhe e ndihmuar nga një kalimtar vendosi të thyente xhamin në përpjekje për të nxjerrë foshnjën e gjallë, por fatkeqësisht ishte e kotë.
Ajo që ndodhi në Romë është një tjetër tragjedi e të ashtuquajturës ‘sindroma e foshnjës së harruar’. Një nga rastet e fundit në Itali daton në vitin 2019, kur në Katania babai i një djali dy vjeçar e la të birin në makinë për pesë orë në diell. Sërish prindi po e çonte fëmijën në çerdhe. Babai kujtoi djalin e tij të vogël të mbetur në makinë vetëm kur gruaja e tij e telefonoi, pasi shkoi në çerdhe për të marrë foshnjën. Burri nxitoi në parking duke gjetur djalin e vogël të pajetë, e dërgoi menjëherë në urgjencën e Poliklinikës, por edhe në atë rast mjekët nuk mundën më të bënin asgjë për ta risjellë në jetë.
Sipas të dhënave të ekspertëve, “Sindroma e Fëmijës së Harruar” ka shkaktuar vdekjen e 11 fëmijëve në Itali që nga viti 1998.
Në vitin 2019 parlamenti italian miratoi dekretin për detyrimin e sediljeve kundër braktisjes në makinë, pra të pajisura me alarm akustik për të kujtuar praninë e fëmijës në makinë. Pajisjet, përveç alarmit vizual dhe zanor, mund të lidhen edhe me telefonat inteligjentë të prindërve përmes aplikacioneve speciale.