Eksploruesit e detit thanë se kanë gjetur rrënojat e një anijeje transporti japoneze të Luftës së Dytë Botërore, SS Montevideo Maru, e cila u përmbys në Filipine në vitin 1942 duke lwnw tw vdekur afro 1000 të burgosur australianë të luftës.
Anija u fundos më 1 korrik 1942 gjatë rrugës për në Hainan të Kinës nga një nëndetëse e Shteteve të Bashkuara, ekuipazhi i së cilës nuk e kuptoi se anija mbante robër lufte. Vendndodhja e rrënojave kishte mbetur një mister për më shumë se 80 vjet.
Anija u gjet në një thellësi prej më shumë se 4 kilometra tha të shtunën grupi i arkeologjisë detare Silentworld Foundation, i cili organizoi misionin.
Mbytja e Montevideo Maru ishte fatkeqësia më e keqe detare e Australisë, duke vrarë rreth 979 qytetarë australianë, përfshirë të paktën 850 ushtarë. Civilë nga 13 vende të tjera ishin gjithashtu në bord, tha fondacioni, duke e çuar numrin e përgjithshëm të të burgosurve të vrarë në rreth 1,060.
“Më në fund, u gjet vendi i prehjes së shpirtrave të humbur të Montevideo Maru”, tha kryeministri i Australisë Anthony Albanese në një postim në Twitter.
“Përpjekja e jashtëzakonshme pas këtij zbulimi flet për të vërtetën e qëndrueshme të premtimit solemn kombëtar të Australisë për të kujtuar dhe nderuar gjithmonë ata që i shërbyen vendit tonë”, shtoi ai.