Anëtari i KQZ-së nga radhët e PDK-së, Betim Gjoshi, ka thënë se ndryshimet që janë bërë në Projektligjin për Zgjedhjet e Përgjithshme nuk e plotësojnë reformën e dëshiruar nga KQZ-ja, mirëpo, sipas tij, me këto ndryshime është përmirësuar teknikisht goxha shumë procesi zgjedhor.
“Mendoj se ndryshimet që janë bërë në Projektligjin për Zgjedhjet e Përgjithshme nuk e plotësojnë reformën e dëshiruar nga KQZ-ja, por me këto ndryshime është përmirësuar teknikisht goxha shumë procesi zgjedhor”, ka thënë Gjoshi në një intervistë për “Epokën e re”, duke shtuar se gjatë leximit të dytë të këtij projektligji deputetët e Kuvendit të Kosovës duhet t’i bëjnë disa përmirësime sa i përket numërimit të votave, sidomos atyre për kandidatë, ku duhet të ofrohet një transparencë më e madhe në mënyrë që të ruhen votat e kandidatëve.
Ai ka treguar se, pavarësisht sfidave dhe problematikave, ky institucion mund t’i organizojë zgjedhjet parlamentare edhe me ligjin e ri.
Gjoshi ka thënë se KQZ-ja do ta bëjë të pamundurën për të pasur zgjedhje të lira dhe demokratike.
“KQZ-ja çdoherë ka qenë e gatshme t’i organizojë zgjedhjet kurdo që është kërkuar një gjë e tillë. Edhe tani jemi të gatshëm të organizojmë zgjedhje qoftë me ligjin aktual, por edhe me ligjin e ri. Të dy ligjet kanë një frymë demokratike të mirë”, ka thënë Gjoshi.
Megjithatë, ai ka thënë se i gjithë procesi është në duart e partive politike.
“Në mungesë të vullnetit politik ka devijuar procesi zgjedhor i 2010-s. Do ta bëjmë të pamundurën të kemi zgjedhje të mira, të cilat do t’i plotësojnë standardet demokratike”, ka deklaruar Gjoshi.