Ramush Haradinaj, i cili ende po qëndron në Slloveni, është lidhur direkt në emisionin Info Magazine në Klan Kosova, ku ka thënë se është në pritje të vendimit për tu kthyer në Kosovë dhe se autoritetet sllovene po bëjnë lojë të ndytë.
“Jam në pritje të autoriteteve të këtushme që të ma kthejnë pasaportën. Deri në atë vendim unë vazhdoj të pres. Mund të them se është tepruar me këtë lojë të ndytë”.
Ai ka thënë se Sllovenia duhet ta ndërpresë këtë lojë për shkak se durimit të tij i ka ardhur fundi.
“Ky është standard dyfytyrësie. Ata që shesin moral për politikë duhet ta dinë që boll është boll. Ka një fund për të gjithë”.
“Instanca më e lartë ndërkombëtare, Haga, i ka dhënë fund kësaj çështjeje”.
“Dhe ky është fundi i durimit tim personal ndaj çdokujt që tallet me mua. Ju bëj thirrje autoriteteve sllovene që ta ndërprejnë këtë lojë”.
I pyetur se a u bën thirrje për qetësi qytetarëve të Kosovës, ai ka thënë se nuk merret me këto punë.
“Unë nuk bëj thirrje për qetësi, sepse nuk merrem me këtë punë. Unë merrem me ata që po bëjnë lojë të ndytë’./Klan Kosova/