Policia e Kosovës ka dorëzuar në Prokurorinë Themelore të Prizrenit një kallëzim penal kundër kryetarit të Komunës së Prizrenit, Ramadan Muja, dhe ish-drejtorit të Administratës, Minir Krasniqi, që aktualisht është kryetar i Degës së PDK-së, lidhur me dyshimin se kanë kryer dy vepra penale, shkruan sot Koha Ditore.
Muja dhe Krasniqi, të cilët vitin e kaluar ishin shpallur fajtor për shpërdorimin e detyrës zyrtare nga Gjykata Themelore e Prizrenit, kësaj here dyshohen për lidhjen e kontratës së dëmshme dhe keqpërdorimin e detyrës apo autoritetit zyrtar.
Zyrtarë të Prokurorisë Themelore në Prizren kanë konfirmuar pranimin e këtij kallëzimi penal.
“Prokuroria Themelore e Prizrenit ka pranuar një kallëzim penal ndaj Minir Krasniqit dhe Ramadan Mujës, madje për veprat penale lidhja e kontratës së dëmshme dhe keqpërdorimi i detyrës apo autoritetit zyrtar”, ka thënë prokurori Genc Nixha nga Departamenti i Krimeve të Rënda në Prokurorinë Themelore të Prizrenit.