Partia Demokratike Turke e Kosovës (KDTP), e cila kishte nominuar për drejtor të Ekonomisë në komunën e Prizrenit, Mehmet Butucin beson në pafajësinë e anëtarit të saj, ani pse tashmë ai është shkarkuar nga kjo detyrë dhe përballet me akuzat për shfrytëzimin e shërbimeve seksuale të viktimës së trafikimit.
Në lidhje me këtë çështje kryesia e KDTP-së në Prizren ka mbajtur një mbledhje të jashtëzakonshme, pas të cilit takim është shprehur qëndrimi se fjalën e fundit në këtë çështje duhet ta japin organet e drejtësisë.
“Si kryesi e degës së KDTP-së në Prizren ndjejmë keqardhje për lajmet dhe shkrimet nëpër media në lidhje me drejtorin e Ekonomisë dhe Financave, Mehmet Butuc. Në lidhje me çështjen, procesi është në hetim e sipër nga prokuroria dhe në këtë moment nuk ka një vendim të prerë. Ne kemi besim të plotë se z.Mehmet Butuc nuk do të ketë asnjë lidhje me këto ngjarje”, thuhet në deklaratën e nënshkruar nga kryetari i degës së KDTP-së, Levent Bush.
Mehmet Butuc është arrestuar javën e kaluar nga Policia e Kosovës me dyshimin e bazuar se ka qenë i përfshirë në kryerjen e veprës penale të shfrytëzimit të shërbimeve seksuale të viktimës së trafikimit me qenie njerëzore. Gjykata Themelore në Prizren më pastaj i ka caktuar masën e arrestit shtëpiak prej 30 ditësh./Koha Ditore/