Këshilli Drejtues i universitetit “Ukshin Hoti” në Prizren ka shfuqizuar vendimin që kishte marrë me datën 20 mars 2018, i cili ishte në kundërshtim me dispozitat e Statutit të UPZ-së. Ky Këshill ka vendosur kësisoj pasi që ditë më parë përkatësisht të mërkurën në UPZ kishte qëndruar ministri i Arsimit, Shyqiri Bytyqi, shkruan sot Koha Ditore.
Burime të gazetës brenda universitetit “Ukshin Hoti” kanë bërë të ditur se çështja e vendimit kundërstatutar është përmendur gjatë takimit që ministri Bytyqi ka zhvilluar me rektorin, Ramë Vataj dhe anëtarët e KD të UPZ-së.
“Anëtarët e KD të UPZ-së pas takimit të mbajtur me ministrin Bytyqi janë mbledhur dhe kanë marrë vendim për shfuqizimin e aktit të miratuar më 20 mars 2018, me të cilin në mënyrë kundërstatutare lejohej zgjedhja e dekanëve edhe me thirrje akademike profesor asistent”, ka thënë burimi i gazetës.