Këshilli Drejtues i Universitetit të Prishtinës të enjten nuk ka mundur të marrë asnjë vendim si përgjigje ndaj kërkesës së katër profesorëve që mbajnë poste të larta publike në institucionet e vendit, shkruan sot KOHA Ditore.
Enver Hasani, kryetar i Gjykatës Kushtetuese, Arsim Bajrami, ministër i Arsimit, Haki Demolli, ministër i Forcës dhe i Sigurisë dhe Hajredin Kuçi, ministër i Drejtësisë, i janë drejtuar një ditë më parë këtij organi me një shkresë kundër vendimit të rektorit të Universitetit për ndryshimin e statusit dhe të pozitës së profesorëve të rregullt të UP-së.
Nëpërmjet këtij vendimi, profesorët e rregullt të UP-së, të cilët janë të zgjedhur ose të emëruar në institucione tjera, do të kenë statusin e profesorëve të angazhuar.
Po ashtu, ata do të paguhen vetëm për orët që mbajnë dhe nuk u njihet e drejta e gjysmënormës, përcjell koha.net. Por këtë vendim e kanë quajtur joligjor katër profesorët, që njëherësh janë edhe shefa në katër institucione të rëndësishme të vendit.