Ilir Baldedaj, këshilltar i Asamblesë Komunale në Prizren ka dalur sot para Gjykatës Themelore në Prizren për tu përballur me akuzën për veprën penale “Mos raportimi ose raportimi i rremë i pasurisë”, raporton Drejtësia Sot.
Në seancën e shqyrtimit fillestar të udhëhequr nga gjyqtari Luan Berisha, së pari u procedua me leximin e aktakuzës nga ana e prokurorit Besim Susuri dhe deklarimin e të pandehurit rreth fajësisë.
Kështu pas leximit të aktakuzës, i pandehuri Baldedaj u deklarua se ndihet fajtor për akuzën në fjalë, se është penduar për veprën e kryer dhe se veprimet e tilla nuk do t’i përsërisë në të ardhmen.
Pas këtij deklarimi, gjyqtari Berisha pasi mori mendimin e prokurorit dhe mbrojtësit të të akuzuarit mori aktvendim dhe aprovoi pranimin e fajësisë.
Tutje pas këtij momenti gjatë deklarimit lidhur me sanksionin penal prokurori Susuri i propozoi gjykatës që me rastin e shqiptimit të dënimit, të pandehurin ta shpallë fajtor dhe të merr për bazë pranimin e fajësisë si rrethanë lehtësuese. Po ashtu, edhe mbrojtësi i të akuzuarit Baldedaj avokati Besim Morina i propozoi gjykatës që ndaj klientit të tij t’i jepet një dënim minimal duke i marrë për bazë rrethanat e pranimit të fajësisë.
Në fund me fjalën e avokatit Besim Morina u pajtua edhe i pandehuri Ilir Baldedaj.
Pas përfundimit të kësaj procedure, gjyqtari Luan Berisha njoftoi se shpallja e aktgjykimit për këtë rast do të bëhet më datë 10 shtator 2021 në ora 09:00.
Sipas pretendimeve të Prokurorisë Themelore në Prizren, i akuzuari Ilir Baldedaj akuzohet se nga data 1 mars 2020 deri më 19 qershor 2020, në Agjencinë Kundër Korrupsionit në Prishtinë, në cilësinë e zyrtarit të lartë publik Prizren, ka vepruar në kundërshtim me nenin 3 paragrafi 1 nën paragrafi 1.1 pika 8 lidhur me nenin 5 dhe nenin 8 paragrafi 1 të Ligjit 04/L-050 për Deklarimin, Prejardhjen dhe Kontrollin e Pasurisë të Zyrtarëve të Lartë Publik dhe Deklarimin, Prejardhjen dhe Kontrollin e Dhuratave për të gjithë Personat Zyrtarë.
Aktakuza sqaron se si zyrtarë publik i pandehuri është i detyruar të bëjë deklarimin e pasurisë, të të ardhurave, dhuratave, të dobisë tjetër pasurore ose detyrime financiare për periudhën 1 janar deri me 31 dhjetor 2019, në atë mënyrë që nuk e ka bërë deklarimin e rregullt vjetor të pasurisë brenda afatit ligjor deri me 31 mars të vitit 2020, i cili afat është zgjatur deri më 19 qershor të vitit 2020.