Partitë në koalicion, ende nuk kanë arritur marrëveshje përfundimtare për ndarjen e pushtetit në Prizren.”Kulaçi” i pushtetit pritet të ndahet pas dhënies së betimit të kryetarit të ri të Prizrenit, Mytaher Haskuka.
“Jo, nuk jemi ulë ende që të bisedojmë për ndarjen e drejtorive. Pas dhënies së betimit të kryetarit Haskuka, do të ulemi dhe bisedojmë në detaje për drejtoritë dhe emrat e atyre që do t’i drejtojnë ato”, tregon me kusht anonimiteti një burim brenda partive në koalicion në Prizren.
Kryetari i ri i Prizrenit, Mytaher Haskuka, të mërkurën e ka marrë detyrën nga ish-kryetari Ramadan Muja, shkruan PrizrenPress.
Shefi i Zyrës për Informim i Komunës së Prizrenit, Ymer Berisha, ndërkaq ka njoftuar se kryetari Haskuka, do të betohet me 22 dhjetor.
Lëvizja Vetëvendosje në zgjedhjet e balotazhi, zyrtarisht ka pasur koalicion vetëm me Nismën dhe disa parti të tjera të cilat nuk kanë fituar asnjë vend në Kuvend.
Jo zyrtarisht ndërkaq, marrëveshje ka pasur edhe me LDK-në.
Haskuka ka premtuar arritjen e një marrëveshje për të qeverisur në katër vitet e ardhshme.
“Me Nismën kemi një marrëveshje të nënshkruar. Do të shikojmë të arrijmë marrëveshje edhe me partitë e tjera. LDK-në dhe partitë minoritare, ngase na duhet shumica në Kuvend”, ka deklaruar Haskuka./PrizrenPress.com/