Koalicioni PDK-AAK-NISMA, sipas rezultateve preliminare, mund ti ketë 39 deputetë në legjislaturën e re të Kuvendit të Kosovës. VV 31, ndërsa LDK-AKR një deputet më pak – 30. Lista Srpska ka siguruar pothuajse shumicën absolute të ulëseve për serbët në Kuvend.
Koalicioni fitues i zgjedhjeve të 11 qershorit, PDK-AAK-NISMA, në bazë të rezultateve preliminare të KQZ’së, ka siguruar 39 ulëse për deputetë në Kuvend të Kosovës.
Tetë deputetë më pak, 31 ulëse, llogaritet t’i ketë, Lëvizja Vetëvendosje, e cila në votimet e djeshme doli e dyta, shkruan Gazeta Express.
Vetëvendosje, në krahasim me legjislaturën e fundit, të shpërberë, të Kuvendit ka dyfishuar mandatet në parlament, gjë që shtyu partinë e Albin Kurtit të festojë si fitore natën e kaluar në shesh.
LDK’ja në koalicion me AKR’në, të dalë si koalicioni i tretë në zgjedhjet e 11 qershorit llogaritet t’i ketë 30 deputetë, tre më pak sesa kjo parti kishte e vetme, pa AKR’në që në 2014’ën nuk kishte kaluar pragun zgjedhorë.
Ky kalkulim i ndarjes së deputetëve është bërë sipas metodës ‘Sainte-Lague’ për llogaritjen e mandateve në Kuvend, shkruan Gazeta Express.
Sipas rezultateve preliminare të KQZ’së, pothuajse të llogaritura të dhënat e votave të rregullta në të gjitha vendvotimet në Kosovë, PDK-AAK-NISMA kanë 34,15% të votave, VV 27,0%, ndërsa LDK-AKR 25,78 përqind të votave.
Në bazë të këtyre rezultateve dhe kalkulimeve për ulëse për deputetë, Lista Srpska ka fituar 8 vende për deputetët serbë, ndërsa NDS dhe SLS nga një vend.
KDTP nga votuesit e saj ka rezervuar 3 ulëse, VAKAT 2, ndërsa pesë parti tjera të komuniteteve tjera që jetojnë në Kosovë, nga vetëm një mandat. /GazetaExpress/.