Libri “Kuteli, kalvari i një jete plot brenga”, i autorit Tomi Mato, ka indinjuar pa masë familjen e shkrimtarit të madh, Mitrush Kuteli.
Atalanta Pasko deklaroi se në 500 faqet e librit ka shumë pak të vërteta që kanë të bëjnë me qytetin ku lindi Kuteli, shkollën e mesme të kryer në Selanik, studimet e larta në Bukuresht dhe që ndërroi jetë në vitin 1967.
Atalanta tha se ka dhe një të vërtetë tjetër; mbesa e Kutelit u martua në vitin 1962 me vëllain e gruas së Tomi Matos dhe kjo sipas saj është fillesa e krijimit të një alibie nga ana e autorit, për të shkruar ato që ajo i quan ‘përçartje’.
Vajza e Dhimitër Paskos kundërshton autorin e biografisë së Kultelit.
Sipas saj, Mato shkruan në libër për mungesë parash dhe shitje tokash, se familja e Dhimitër Paskos kishte hyrë në borxhe të mëdha për shkak të studimeve të tij, ndërsa personazhe janë bërë edhe Dhimitër Berati, Viktor Eftimiu për t’i gjetur punë Mitrushit, por që kjo është thjesht gënjeshtër.
Por përplasja më e fortë mes familjarëve dhe autorit të librit janë njohja e Kutelit me bashkëshorten.
Tomi Mato shkruan në libër se Kuteli u njoh me gruan e tij në plazh.
Ndërsa, Atalanta Pasko sqaron për GSH-në se babai dhe nëna e saj u njohën në një ngushëllim.
Gjithashtu, Pasko thotë se Mato gënjen për dasmën pasi ajo nuk u bë, për muajin e mjaltit, një fletërrufe vendosur (sipas autorit) Kutelit në vitin 1967 në qendër të Tiranës etj.