Diga e liqenit në Mirushë të Malishevës, që kishte pësuar dëmtime të konsiderueshme gjatë vitit 2016, ende nuk është sanuar. Madje as memorandumi i nënshkruar për këtë qëllim nga drejtuesit e Ministrisë së Mjedisit dhe të Komunës së Malishevës nuk është zbatuar. Si pasojë e mosrealizimit të kësaj marrëveshjeje, gjendja ka mbetur ashtu siç ka qenë në vitin 2016.
“Më 2 shtator 2016 është nënshkruar marrëveshja me Ministrinë e Mjedisit dhe Planifikimit Hapësinor për ndarjen e mjeteve financiare nga kjo ministri për sanimin e digës në Mirushë. Mirëpo, kjo marrëveshje nuk është realizuar asnjëherë”, ka thënë zyrtari për informim në Komunën e Malishevës, Artan Paçarizi. Sipas tij, asokohe memorandumi për investim në rregullimin e digës së liqenit në Mirushë ishte nënshkruar nga u.d. ministri i MMPH-së, Ferat Shala dhe kryetari i Komunës së Malishevës, Ragip Begaj.
“Shuma e ndarë nga kjo ministri ka qenë 55 mijë euro, derisa pjesa tjetër e investimit do të mbulohej nga Komuna e Malishevës. Por një gjë e tillë nuk është realizuar”, ka deklaruar Paçarizi, duke përkujtuar se MMPH-ja si përgjegjëse për menaxhimin e ujërave ka përgjegjësi më të madhe në këtë drejtim në krahasim me organet komunale.