Takimi dyditor i delegacionit të Kosovës me atë të Serbisë dhe marrëveshja e arritur nën ndërmjetësimin e Shteteve të Bashkuara të Amerikës ka shkaktuar përçarje mes zyrtarëve serbë dhe atyre rusë.
E para që filloi këtë përçarje ishte zëdhënësja e Ministrisë së Punëve të Jashtme të Rusisë, Maria Zakhraova.
Ajo e postoi fotografinë e presidentit të Serbisë, Aleksandar Vuçiq, i ulur përballë tryezës së homologut të tij amerikan, Donald Trump dhe poshtë saj një fotografi të aktores Sharon Stone, që në atë rol po merrej në pyetje nga policia.
Postimi i zyrtares ruse nxiti reagimin e drejtorit të të ashtuquajturës Zyre për Kosovën në Qeverinë e Serbisë, Marko Gjuriq, i cili tha se Vuçiq nuk ka thënë asnjë fjalë të keqe kundër Rusisë dhe se asaj duhet t’i vijë turp për këtë veprim.
“Ky president nuk e tha asnjë fjalë të keqe kundër Rusisë. Ai president priti për një orë e gjysmë për t’u takuar me presidentin rus dhe nuk kërkoi karrige të veçantë. Unë nuk do të lejoj të sulmoni Serbinë krenare. Turp të kesh!”, u shpreh në Twitter. /Gazeta Sinjali/