Kryetari i Komunës së Malishevës Ragip Begaj, ka pasur të martën edhe një takim me përfaqësuesit e grupit të profesorëve dhe arsimtarëve të larguar nga puna nga kjo komunë.
Sedat Sahitaj, ish-profesor i Qendrës së Kompetencës, ka bërë me dije se kryetari Begaj ka premtuar se do ta formojë një komision për shqyrtimin e ankesave të të pakënaqurve ku, sipas Sahitajt, edhe një përfaqësues i të pakënaqurve do të jetë pjesë e këtij komisioni. Por kryetari Begaj të njëjtën ditë ka mohuar të ketë premtuar se në këtë komision do të jetë i përfshirë edhe përfaqësuesi i të pakënaqurve.
“Do të formoj atë komision, por kam premtuar se një përfaqësues i të pakënaqurve mund të jetë vëzhgues aty e jo anëtar komisioni”, ka thënë Begaj. Ai ka bërë me dije se lëndët e mësimdhënësve që kanë mbetur pa punë në Komunën e Malishevës i ka kërkuar për shqyrtim edhe Inspektorati i Arsimit nga Ministria e Arsimit në Prishtinë. “Inspektorati sigurisht do të marrë një vendim në lidhje me ato lëndë dhe kjo e bën të panevojshëm komisionin, por pasi po kërkojnë do ta formojë atë”, ka theksuar Begaj, shkruan Koha Ditore.