Në Rahovec po vazhdon regjistrimi i Legalizimit të ndërtimeve pa leje, gjegjësisht ndërtimeve ekzistuese në kohën e hyrjes në fuqi të Ligjit për Trajtimin e Ndërtimeve pa Leje sipas dëshmive të hartës ortofoto digjitale të datës 13 gusht 2013.
Zyra e Legalizimit në Rahovec është nga mëngjesi e vizituar nga qytetarët, si nga qyteti ashtu edhe nga pjesët rurale, ku po aplikohet për regjistrim të legalizimit të ndërtimeve pa leje.
Koordinatori i Zyrës për Legalizim, Jeton Kadiri, thotë se në ditë po regjistrohen 80 – 100 qytetarë të cilit po aplikojnë, ku afati i regjistrimit është 05 shkurt 2015, ndërkaq në zyrën e Rahovecit punon stafi prej 6 anëtarësh.
Kadiri thotë se zyrtarisht nuk ka informata se a do të shtyhet afati i regjistrimit, ku sipas dinamikës së punës, afati duket i shkurtër duke marrë parasysh numrin e madh të ndërtimeve pa leje. Sidoqoftë, Kadiri thotë se pas 5 shkurtit, do të bëhet inspektimi i të gjitha aplikacioneve.