Në emër të kryetarit të Komunës së Malishevës, Ragip Begaj, nënkryetari Hajdin Berisha, ka urdhëruar Drejtorinë e Administratës, se duke filluar nga 21 dhjetor 2020, e deri më 21 janar 2021, parkingu në oborrin e kësaj komune të jetë në shërbim vetëm të mërgimtarëve.
Komuna e Malishevës ka njoftuar se me këtë vendim ndalohet parkimi i veturave nga zyrtarët komunalë apo veturat tjera private.
“Në urdhëresën administrative, 01/1379 të datës 21/12/2020, urdhërohet Drejtoria e Administratës, që përmes shërbimit të sigurimit, të ndalojë parkimin e automjeteve private në oborrin e komunës për të gjithë punëtorët e administratës së komunës dhe të gjitha veturat tjera private, nga ora 08:00-16:00, për shkak të lirimit të hapësirës së mjaftueshme për parkim gjatë marrjes së shërbimeve komunale, për të gjithë mërgimtarët e Komunës së Malishevës dhe më gjerë”, ka njoftuar Komuna e Malishevës.