Janë pesë kandidatë që ia mësyejnë postit të kryeministrit të Kosovës pas zgjedhjeve të 8 qershorit. Ata vijnë nga pesë parti politike të cilat deri në këto zgjedhje ishin subjektet kryesore në kuadër të spektrit politik në vend. E përbashkëta e këtyre kandidatëve është premtimi i tyre për gjenerimin e vendeve të reja të punës. Kurse si adut tjetër mbetet premtimi parazgjedhor për ndërtimin e një shteti ligjor dhe të aftë për të synuar integrimet evropiane përmes luftimit të krimit të organizuar dhe korrupsionit si probleme të mëdha të këtij vendi.
Partia Demokratike e Kosovës ka nominuar tashmë për të tretën herë liderin e saj Hashim Thaçi për postin e kryeministrit. Thaçi ka drejtuar në dy mandatet e fundit qeverinë e vendit, ndonëse në asnjërin mandat nuk arriti t’i përmbyllë katër vjet udhëheqje të qeverisë për shkak të koalicioneve të brishta. Paraprakisht ish-Shefi i Drejtorisë Politike të UÇK-së, pati drejtuar edhe Qeverinë e Përkohshme të Kosovës e cila nuk ishte njohur asnjëherë nga faktori ndërkombëtar.
Në këto zgjedhje, Thaçi hyn me premtimin për themelimin e Fondit të Punësimit, si zotimi i tij kryesor në “Misionin e Ri”, ndonëse nuk e ka sqaruar ende as formën ligjore të themelimit të këtij fondi, sikurse as fazat e zbatimit, interesin dhe limitet shpenzuese të tij gjatë katër viteve të qeverisë së ardhshme./Tribuna/