Largimi i Kylian Mbappe nga PSG duket se ka hapur një faqe të re të kësaj sage pasi sipas mediave franceze klubi ka detyrime të pashlyera ndaj sulmuesit.
Kompleksi ‘Newco Elan’ ofron banesa të ëndrrave tuaja në zemër të Prizrenit
25-vjeçari më në fund konfirmoi në fillim të këtij muaji se do të largohet nga PSG këtë verë, dhe ai pritet t’i bashkohet Real Madrid-it në një transferim të lirë kur t’i skadojë kontrata në qershor.
Mbappe fitoi Kupën e Francës në ndeshjen e tij të fundit të shtunën, por duket se nuk është gjithçka mirë në prapaskenë mes Mbappe dhe PSG.
Sipas “L’Equipe”, Mbappe-s nuk iu pagua paga për muajin prill dhe ai ende nuk ka marrë një bonus që daton nga shkurti.
Raporti i “L’Equipe” thotë se PSG që nuk i bën këto pagesa për Mbappe-n ka kursyer rreth 80 milionë euro.
PSG thuhet se ka pohuar se ata thjesht “harruan” të paguajnë Mbappe-n.
Avokatët e PSG-së dhe Mbappe-s tani po përpiqen të negociojnë largimin e lojtarit nga klubi pas 12 muajve të fundit të vështirë për sulmuesin.
Mbappe u la jashtë turneut para-sezonal të PSG-së në Azi verën e kaluar mes pasigurisë për të ardhmen e tij, dhe më pas u vu në listën e tyre të “të padëshiruarve” dhe u detyrua të stërvitet larg skuadrës së parë për refuzimin për të nënshkruar një zgjatje të kontratës.
Më pas ai ra dakord të qëndronte për një vit tjetër dhe u riintegrua në skuadër nga trajneri Luis Enrique.
Mbappe i la spekulimet rreth të ardhmes së tij në njërën anë, pasi ai shënoi 44 gola në 48 ndeshje në sezonin 2023-24, duke e çuar PSG-në drejt titullit të Ligue 1, Kupës së Francës dhe gjysmëfinaleve të Champions League.
Mbappe duket se do të largohet nga PSG me bekimin e bashkëlojtarëve të tij pasi organizoi një festë lamtumire për 250 të ftuar javën e kaluar në Paris, por marrëdhënia e tij me klubin duket më e tensionuar se kurrë.
Ai tashmë po përgatitet për jetën në Madrid, pasi thuhet se ka blerë një mega-rezidencë 15 milionë paundëshe në kryeqytetin spanjoll.
Lëvizja e tij te gjigantët spanjollë mund të njoftohet para Euro 2024, me Mbappe të vendosur të udhëheqë Francën në turneun në Gjermani 18 muaj pas humbjes së tyre në finalen e Kupës së Botës nga Argjentina. Albanian Post