Prej kur erdhi në pushtet, njëri nga premtimet kryesore që kishte bërë koalicioni aktual, PDK-LDK, kishte qenë lufta ndaj kompanive që kanë krijuar monopole në tregun e Kosovës. Por, veç deklaratave mediale deri sot nuk pati ndonjë veprim konkret nga Qeveria e Isa Mustafës. Sipas analistëve të ekonomisë janë fajtorë ministrat përkatës të Qeverisë kosovare ata që nuk po i luftojnë monopolet në biznes dhe kjo ka bërë që të ngulfaten bizneset e ligjshme në shumë fusha.
Njohës të kësaj fushe thonë se kjo ndodh për shkak se bizneset monopoliste, të udhëhequra nga oligarkët e Qeverisë këtë po e arrijnë në saje të korrupsionit që i lidh oligarkët me pushtetarët.
Sipas tyre, nuk është në interesin e pushtetarëve që të bëjnë publike edhe për opinionin publik identifikimin e bizneseve monopoliste, sepse prapa tyre pa dyshim që qëndrojnë vetë mafiozët e politikës, se pa ndihmën e tyre këto biznese nuk do të kishin asnjë gjasë që të krijojnë monopol në ekonominë e Kosovës. Veç saj, analistët thonë se këta ministra e zyrtarë të tjerë i mbyllin sytë dhe heshtin, në mënyrë që këto kompani monopoliste të vazhdojnë pa i shqetësuar askush ta mbajnë dhe forcojnë akoma më shumë monopolin në ekonominë e përgjithshme të Kosovës, ngase nga kjo përfitojnë të gjitha palët e krimit.
Ministrat po i mbyllin sytë para shkeljes së ligjit
Deputetë të Kuvendit të Kosovës nga opozita thonë se prapa shumicës së bizneseve monopoliste qëndrojnë politikanët e koalicionit aktual. Kështu, deputeti opozitar, Enver Hoti (Nisma për Kosovën), thotë për gazetën “Kosova Sot” se nuk janë në interesin e pushtetarëve që zyrtarisht ta bëjnë publike edhe për opinionin publik identifikimin e bizneseve monopoliste, sepse prapa tyre pa dyshim qëndrojnë vetë mafiozët e politikës dhe Qeverisë. Hoti thotë se PDK-ja nuk ka lidhur koalicion me LDK-në, që LDK-ja dhe ministrat e saj të ndërmarrin masa, për ta thyer këtë monopol që ka shkatërruar dhe po vazhdon ta shkatërrojë ekonominë e Kosovës.”Prandaj, këta ministra i mbyllin sytë dhe heshtin, në mënyrë që këto kompani monopoliste të vazhdojnë pa i shqetësuar askush ta mbajnë dhe forcojnë akoma më shumë monopolin në ekonominë e përgjithshme të Kosovës”, ka theksuar ai.
Analisti i ekonomisë, Ardi Nokaj, thotë për “Kosova Sot” se janë vetë ministrat e kësaj qeverie që janë nën kthetrat e oligarkëve të bizneseve të inkriminuara saqë ngulfasin e nuk lejojnë frymën e lirë të biznesit në tregun e lirë. Ai është i mendimit se mafio-politika është aktori kryesor krimogjen që nuk lejohet thyerja e monopoleve dhe pse tregu i lirë që është i garantuar me ligj dhe me Kushtetutë.”Të gjitha institucionet në realitet po i udhëheqin realisht mafiopolitika oligarkike apo nëntoka kriminale, gjë që po dëshmohet edhe nga përgjimet ‘Pronto 2’, e që mund të dalin edhe shumë përgjime të tjera ‘Pronto 3 e 4’, ku shihet qartë se ata janë përgjegjësit kryesorë për të gjitha të këqijat që i kanë ndodhur këtij vendi deri sot. Ky është vlerësimi që e thonë ekspertët e ekonomisë dhe përfaqësuesit e odave ekonomike që afarojnë në vendin tonë”, ka thënë ai.