Gjykata Themelore në Gjakovë, dega në Rahovec, ka shqiptuar dënim me tre muaj burgim me kusht për të akuzuarin për veprën penale “lëndim i lehtë trupor”, Reshat Hamza.
Dënimi me kusht nuk do të ekzekutohet nëse në periudhën një vjeçare, i akuzuari Hamza nuk kryen vepër tjetër penale.
Aktgjykimi ndaj tij është shpallur nga gjykatësi Mizahir Shabani, pasi që i akuzuari paraprakisht e ka pranuar fajësinë për akuzën me të cilën ngarkohet, raporton “Betimi për Drejtësi”.
I akuzuari Hamza, ka thënë se ndihet fajtor për veprën të cilën e ka kryer dhe pendohet për rastin që i ka ndodhur.
Ai ka kërkuar nga gjykata që me rastin e caktimit të dënimit të ketë parasysh se është i gjendjes së dobët ekonomike, mbajtës i familjes, ashtu që t’i shqiptojë një dëmin sa më të butë.
Pranimin e fajësisë nga ana e të akuzuarit nuk e ka kundërshtuar prokurori Dëshire Jusaj.
Gjykatësi Shabani, të akuzuarin e ka liruar nga shpenzimet procedurale pasi që është shfrytëzues i ndihmës sociale.
Për të njëjtën vepër penale ka qenë i akuzuar edhe Elvir Hamza, por pasi që ka pranuar urdhrin ndëshkimor, ai e ka paguar atë dhe nuk ka paraqitur kundërshtim.
Ndryshe, Prokuroria Themelore në Gjakovë, ka ngritur aktakuzë më 12 tetor 2017, ndaj Reshat Hamza dhe Elvir Hamza, duke i ngarkuar ata me veprën penale “lëndim i lehtë trupor”.
Sipas aktakuzës, i pandehuri më 18 korrik 2017, rreth orës 16:10, në Rahovec pikërisht pranë shtëpisë së tij i shkakton lëndime të lehta trupore të dëmtuarit-akuzuarit Elvir Hamza.
Në aktakuzë thuhet se deri te kjo mosmarrëveshje kishte ardhur si pasojë e disa mbeturinave të cilat i dëmtuari-i akuzuari Elvir Hamza kishte vendosur në oborrin e të akuzuarit Reshat Hamza, i njëjti kishte kërkuar nga i dëmtuari t’i largonte ato, por ai kishte refuzuar.
Në aktakuzë thuhet se të akuzuarit fillimisht fyhen mes veti, e më pas sulmojnë njëri-tjetrin me grushte në kokë, e me këtë veprim marrin lëndime të lehta trupore që të dy. /BetimipërDrejtësi