Gjykata Themelore në Prizren ka demantuar lajmet e publikuar në media lidhur me rastin e dënimit të Abdullah Thaçit.
“I akuzuari me datën 31 korrik të vitit 2012 , rreth orës 16:47 minuta në Prizren në ndërtesën e Pro CreditBank, derisa ishte gjatë orarit të tij të punës në cilësinë e personit zyrtar, pa autorizim kumton, dërgon dhe vë në dispozicion personit tjetër informacionin, i cili përbën fshehtësi zyrtare ose siguron informacionin e tillë, me qëllim që atë informacion ta përcjellë te një person i paautorizuar, në atë mënyrë që duke mos pasur autorizim i qaset llogarive bankare të dy klientëve të bankës, pikërisht të llogarisë bankare të NexhatÇoçaj dhe llogarisë bankare të Bekim Thaqit, duke hyrë në llogaritë e tyre nëpërmes sistemit qendror elektronik të bankës, i printon informacionet të cilat përbëjnë fshehtësi zyrtare- gjendjen e llogarive bankare të dy klientëve të bankës, duke thyer procedurat e aplikueshme bankare, e pikërisht marrëveshjen mbi konfidencialitetin dhe mos zbulimin e informacioneve bankare”, thuhet në reagimin e Gjykatës Themelore në Prizren, transmeton “PrizrenPress”.
“Këso dore ka kryer veprën penale zbulim i fshehtësisë zyrtare nga neni 347 par.1 të KPK-së”.
“Gjykata Themelore në Prizren ka mbajtur 14 seanca gjyqësore, dhe në seancën e fundit të mbajtur me datën 04.08.2015, i akuzuari në fillim të shqyrtimit kryesor e pranon fajësinë lidhur me veprën penale e cila i vihet në barrë”.
“Gjykata Themelore në Prizren e ka shpallur fajtor dhe të njëjtin e ka dënuar me burgim në kohëzgjatje prej 6 (gjashtë) muajve, i cili dënim i zëvendësohet me dënim me gjobë në shumën prej 5.000 (pesëmijë) euro. Pra Gjykata e ka dënuar të akuzuarin në fjalë i cili e ka zbuluar fshehtësinë zyrtare për të cilën e ka pasur obligim ta ruaj”.
“Nuk janë të vërteta disa deklarata që janë publiku në lajme dhe portale lidhur me atë se Gjykata Themelore në Prizren “dënon denoncuesin dhe nuk e trajton fare rastin e drejtorit i cili ka abuzuar me mjete publike”.
“Për dijeninë e të gjithëve është se pranë kësaj Gjykate është duke u zhvilluar procesi gjyqësor ndaj Drejtorit të Arsimit të Komunës së Prizrenit Nexhat Çoçaj dhe Bekim Thaqit mësimdhënës për – Keqpërdorim të pozitës apo autoritetit zyrtar nga neni 422/1-31 të KPK-së, – dhe së shpejti pritet përfundimi i këtij procesi gjyqësor”. /PrizrenPress.com/