Në Gjykatën Themelore në Prizren, në seancën e së martës, pas kthimit të çështjes në rigjykim nga Gjykata e Apelit, i akuzuari Nijazi Kryeziu është deklaruar i pafajshëm për akuzat për korrupsion.
Kryeziu po akuzohet se në cilësinë e drejtorit të Urbanizmit dhe Planifikimit Hapësinor në Komunën e Prizrenit, pa ndonjë procedurë të tenderimit, në kundërshtim me Ligjin e Prokurimit Publik, Ligjin për Menaxhimin e Financave Publike, si dhe Rregulloren e Thesarit, kishte lidhur kontratë për emetimin e spoteve reklamuese për nevojat e Drejtorisë së Urbanizmit dhe Planifikimit Hapësinor të Komunës së Prizrenit, raporton “Betimi për Drejtësi”.
Pas leximit të aktakuzës nga prokurori Mehdi Sefa, i akuzuari Kryeziu u deklarua i pafajshëm për veprën penale që i vihet në barrë.
Prokurori Sefa tha se qëndron pranë fjalës hyrëse të cilën e kishte dhënë më 5 tetor 2022, ndërsa përfaqësuesi i palës së dëmtuar, avokati Blerim Mazreku ka thënë se e mbështetet fjalën hyrëse të prokurorit dhe se parashtron kërkesë pasurore-juridike.
Mazreku ka shtuar se deri më tani nuk është vlerësuar dëmi në bazë të ekspertizave, andaj sipas tij këtë do ta realizojë në procedurë konstestimore nëse i akuzuari Kryeziu shpallet fajtor.
Kurse, mbrojtësi i të akuzuarit Kryeziu, avokati Kujtim Kërveshi ka dekaluar se qëndron pranë fjalës hyrëse të dhënë më 5 tetor 2020.
Tutje, prokurori Sefa ka propozuar që të dëgjohet eksperti financiar Agim Sheqiri.
Ndërsa, avokati Mazreku ka kundërshtuar dëgjimin e ekspertit Sheqiri, pasi që sipas tij gjykata e shkallës së parë së pari duhet të veprojë sipas udhëzimit të Gjykatës së Apelit.
Ai tha se Apeli me aktvendim ka udhëzuar këtë gjykatë që të vendos për pranueshmërinë e ekspertizës si provë e pastaj të dëgjohet eksperti.
“Në rast se e njëjta pranohet si provë, atëherë duhet të ftohet eksperti në fjalë, ndërsa në rast se e njëjta nuk pranohet si provë përkatësisht shpallet provë e papranueshme, atëherë gjykata duhet të caktojë ekspert tjetër”, tha Mazreku.
Propozimin e prokurorit Sefa, e ka kundërshtuar edhe avokati Kërveshi, i cili tha se Gjykata e Apelit si arsye për prishjen e aktgjykimit të shkallës së parë, ka veçuar faktin e kontradiktorialitetit në arsyetimin e këtij aktgjykimi.
“Kjo gjykatë në aktgjykim, në arsyetim i është referuar provës ekspertizë e ekspertit Sheqiri që për të njëjtën ekspertizë ka vlerësuar se është provë e papranueshme, andaj Gjykata e Apelit ka kërkuar që të eliminohet kjo kontradiktë në arsyetim”, tha avokati Kerveshi.
Po ashtu, ai tha se Apeli nuk e ka obliguar por ia ka lënë në vlerësim gjykatës së shkallës së parë që të dëgjohet eksperti apo të bëhet ekspertizë e re financiare.
Ndryshe, Gjykata Themelore në Prizren të akuzuarin Kryeziu më 21 shtator 2021 e ka liruar nga akuza për korrupsion, mirëpo Gjykata e Apelit e ka kthyer rastin në rigjykim.
Seanca e radhës është caktuar të mbahet më 30 shtator 2022.
Në aktakuzën e Prokurorisë Themelore Prizren të ngritur më 2 gusht 2019, i pandehuri Nijazi Kryeziu akuzohet për veprën penale të keqpërdorimit të pozitës apo autoritetit zyrtar.
Sipas aktakuzës, Nijazi Kryeziu, akuzohet se gjatë periudhës kohore janar – dhjetor 2015, në cilësinë e drejtorit të Urbanizmit dhe Planifikimit Hapësinor në Komunën e Prizrenit, nuk i ka përmbushur detyrat apo autoritetin zyrtar, me qëllim të përfitimit të çfarëdo dobie për personat tjerë juridik, TV Opinion.
Në aktakuzë thuhet se i akuzuari Kryeziu, duke mos e përmbushur detyrën e përcaktuar me ligj, pa ndonjë procedurë të tenderimit në kundërshtim me Ligjin e Prokurimit Publik, Ligjin për Menaxhimin e Financave Publike, si dhe Rregulloren e Thesarit, kishte lidhur kontratë për emetimin e spoteve reklamuese për nevojat e Drejtorisë së Urbanizmit dhe Planifikimit Hapësinor të Komunës së Prizrenit.
Sipas aktakuzës, Kryeziu, gjatë periudhës kohore 1 janar 2015 e deri më 31 dhjetor 2015, kishte lidhur kontratë me TV Opinionin, në vlerë prej 600 euro në muaj, dhe se për 12 muaj ka paguar 7 mijë e 200 euro.
Me këtë, akuzohet se ka kryer veprën penale “Keqpërdorim i detyrës zyrtare apo autoritetit zyrtar”, nga neni 422, par.1 lidhur me par.2, nënpar.2.2 të Kodit Penal. /BetimipërDrejtësi