Kryetari i Komunës së Prizrenit, Mytaher Haskuka së bashku me drejtoreshën e Drejtorisë Komunale të Arsimit, Xhemile Thaçi Vezgishi, morën pjesë në programin kulturo artistik të shfaqur nga nxënësit e gjimnazit “Remzi Ademaj” për nder të 11 vjetorit të themelimit të kësaj shkolle dhe ditëlindjes së heroit kombëtar Remzi Ademaj – komandant Petritit.
Me këtë rast kryetari Haskuka duke i uruar nxënësit dhe mësimdhënies e shkollës për ditën këtij gjimnazi, deklaroi se kjo shkollë mbanë emrin e një heroi të madh, i cili jo vetëm që u flijua për atdhe por, duke qënë një aktivist i zgjuar politik, prapa tij la një trashëgimi të madhe.
“Heroi Remzi Ademaj, duke krijuar shumë organizata, siç është organizata paralele për ofrimin e shërbimeve gjatë periudhës më të vështirë të okupimit serb. Inicoi krijimin e shoqatës për luftimin e analfabetizmit në Zhur, ishte themelues i shoqatës “Nënë Tereza” në Zhur dhe po ashtu inicues i themelimit të Këshillit për mbrojtjen e drejtave dhe lirive të njeriut.”, tha kryetari Haskuka.
Ai theksoi se të gjitha këto, duhet të jenë shembull se si punohet për atdhe, popull, liri dhe shtet, jo vetëm për nxënësit e kësaj shkolle që e mbanë emrin e tij, por për të gjithë që e duan zhvillimin e vendit.