Më rastin e 80-vjetorit të lindjes së Adem Demaçit, më 23 shtator nis në Bibliotekën Kombëtare të Kosovës një program special kushtuar figurës së tij si simbol i rezistencës dhe fitues i çmimit “Saharov” nga Parlamenti Evropian.
Në simpoziumin e tretë internacional që mbahet mes datave 23 e 28 shtator organizuar nga Unioni i Shkrimtarëve dhe Kritikëve Shqiptarë do të marrin pjesë mbi 20 personalitete të shquara të letërsisë e kritikë nga disa shtete të Evropës siç janë Belgjika, Spanja, Franca, etj.
Reshat Sahitaj, kryetar i Unionit të Shkrimtarëve dhe Kritikëve Shqiptarë ka bërë të ditur se në mbrëmjen hapëse do të referojnë akademik Rexhep Qosja, Prof. Dr. Daniel Leuwers nga Franca, Behare Rexhepi dhe Prof. Dr. Begzat Baliu.
Gjithashtu do të interpretohet një këngë nga sopranoja Saranda Ailaj e përcjellë me kitare nga Ylber Asllanaj dhe do të lexohen poezi kushtuar Demaçit nga Agim Vinca e disa poetë të njohur nga Kosova e vendet e tjera.
Ky simpozium organizohet nga Unioni i Shkrimtarëve dhe Kritikëve Shqiptarë, ndërsa mbështetet nga Ministria e Kulturës, Rinisë dhe Sportit dhe Kuvendi Komunal i Prishtinës.