“Prania e zonave të mëdha e të përshtatshme për bujqësi dhe blegtori ka bërë që politikat bujqësore të Komunës së Prizrenit të jenë prioritete që synojnë rritjen e produktivitetit të bujqësisë e të të ardhurave për popullsinë rurale, duke rritur mirëqenien e saj, përmes përmirësimit të kushteve të punës dhe të jetesës, si dhe duke krijuar mundësi të barabarta për burrat dhe gratë”, kështu është shprehur kryetari i Prizrenit, Shaqir Totaj në Parlamentin e Dytë Rural në Kosovë, që organizohet nga Rrjeti i Organizatave për Zhvillim Rural të Kosovës, e që ka për qëllim ndërtimin e kapaciteteve, rrjetëzimin me organizatat e ndryshme që veprojnë në zonat rurale, ngritjen e vetëdijes për rolin e femrës rurale, organizimin e programeve të ndryshme mbështetëse për rininë rurale, etj.
Kryetari Totaj ka potencuar se zhvillimi i qëndrueshëm i komunitetit rural, rrjedhimisht, zhvillon edhe turizmin rural, për të cilën gjë ne punojmë në vazhdimësi.
Ai ka thënë se fondet shtetërore janë të nevojshme për t’u pajisur me mjete moderne të prodhimit, për të zotëruar teknologjitë e reja dhe blerjen e pajisjeve, gjë që sipas tij Komuna e Prizrenit vazhdimisht ka inkurajuar dhe subvencionuar bujqit./ PrizrenPress.com