Forumi i diskutimit “Trashëgimia Kulturore dhe Aktivizmi”, do të mbahet sot në kafe-bar “Kafiç” në Prizren, në orën 17:00.Ky diskutim mbahet në kuadër të projektit “Aktivizmi kulturor dhe urban në Prizren”, i cili është financuar nga Ambasada e Shteteve të Bashkuara në Prishtinë.
Drejtori Ekzekutiv Hajrulla Çeku, thotë se ky forum do të diskutojë mbi potencialin e aktivizmit urban në Prizren për të penguar degradimin e mëtejmë të trashëgimisë kulturore të qytetit.
Panelistë të këtij forumi do të jenë: Vesel Hoxhaj nga Këshilli për Trashëgiminë Kulturore të Prizrenit, Rozafa Basha nga “EC Ma Ndryshe”, Eliza Hoxha, arkitekte dhe Hasan Hoti nga Qendra Rajonale për Trashëgimi Kulturore në Prizren.
“Forumi i diskutimit “Trashëgimia kulturore dhe aktivizmi” është i dyti në ciklin e pesë forumeve të diskutimit që do të organizohen në baza mujore në Prizren”,tha Çeku.
“Këto forume janë pjesë e projektit “Aktivizmi kulturor dhe urban në Prizren”, i cili synon të nxisë debat shoqëror mbi rolin e aktivizmit kulturor në transformimin urban të qytetit”.
“Në esencë, projekti është një nismë e intervenimit kulturor dhe artistik që synon t’i trajtojë në mënyrë kreative sfidat e zhvillimit urban dhe reformës demokratike në Prizren”.
Përveç forumeve të diskutimit, gjatë vitit 2014 pjesë e këtij projekti do të jenë edhe këto aktivitete: hulumtimi mbi potecialin e aktivizmin kulturor dhe urban në Prizren, intervenimet artistike në hapësirën publike, platforma virtuale për blogging kulturor dhe konferenca rajonale për shkëmbimin e përvojave mes aktivistëve kulturor nga shtetet e Ballkanit Perëndimor./PrizrenPress.com/