Një rast i rëndë i ndodhi familjes Vezaj në Prizren, pasditen e djeshme, pasi vdiq familjari i tyre, Rexhepi, si pasojë e goditjes nga rrufeja.
Viktima u dërgua në spital, por fatkeqësisht nuk mbijetoi. 55-vjeçari ishte duke mbledhur sanë me traktor, në momentin që rrufeja e goditi.
Viktima u dërgua në spital për trajtim mjekësor, por përkundër intervenimit të mjekëve, nuk arriti të mbijetojë.
Ky rast me urdhër të Prokurorit të Shtetit u iniciua si “vdekje e dyshimtë”. Këtë cilësim, avokati Besnik Berisha po e quan të panevojshëm, madje të rëndë për familjen e viktimës.
“Veprim hetimor absolutisht i panevojshëm ne këtë rast, por edhe i rëndë për familjen. Jam kureshtar të di se çfarë pret ky prokuror/e te zbulojë në këtë rast me autopsi?!Definitivisht dikush duhet t’ua mësojë se jo çdo vdekje e raportuar duhet të përfundojë në IML, sidomos kur shkaku i vdekjes është i njohur e dyshime për faj njeriu nuk ka. Kurseni nga traumat e dyfishta familjarët dhe mos i ngarkoni me punë pa nevojë zyrtarët”, ka shkruar Berisha në Facebook.
Trupi i pajetë i 55-vjeçarit që vdiq tashmë është dërguar në IML për obduksion.