Zëvendëskomandanti i Stacionit Policor në Dragash, Eljam Seferi, i akuzuar për keqpërdorim të pozitës apo autoritetit zyrtar, të mërkurën, nuk e ka pranuar fajësinë për veprën penale që ngarkohet.
Gjatë shqyrtimit fillestar të mbajtur në Gjykatën Themelore në Prizren, prokurori i rastit, Metush Biraj, ka lexuar aktakuzën, ndërsa i pandehuri Seferi, pas konsultimit me avokatin e tij, Hajrip Krasniqin, ka deklaruar se nuk e ndien veten fajtor për akuzat që i vihen në barrë.
Kryetari i trupit gjykues, Artan Sejrani, shqyrtimin e dytë në këtë çështje penale e ka caktuar për 19 shtator 2017, në ora 14:00 dhe e ka njoftuar të akuzuarin dhe mbrojtësin e tij se deri në shqyrtim të dytë kanë të drejtë të bëjnë kundërshtimin e provave dhe të aktakuzës në tërësi.
Ndryshe, Prokuroria Themelore në Prizren e akuzon Eljami Seferin se gjatë zbatimit të një urdhërarresti të lëshuar nga Gjykata Themelore në Prizren, nuk i ka përmbushur detyrat e tij zyrtare, me qëllim që t’i shkaktojë dobi personit tjetër.
Sipas aktakuzës, i akuzuari Seferi, më 1 qershor 2017, së bashku me zyrtarë tjerë policorë, ka shkuar në shtëpinë e Mexhait Qerimit në fshatin Bresanë të Komunës së Dragashit, për ta arrestuar të njëjtin sipas urdhëresës së gjykatës, por Qerimi ka ikur.
Në aktakuzë thuhet se i akuzuari Seferi pasi ka biseduar me Mexhait Qerimin rreth çështjes së arrestimit të tij, ka lejuar që i njëjti të futet në shtëpi, me pretekst që të përgatitet dhe më pas ai është arratisur. Ndërsa, i akuzuari nuk ka urdhëruar bastisjen e shtëpisë, objekteve përcjellëse dhe kërkimin e tij, por pa lënë patrullë policore për të vëzhguar shtëpinë, e urdhëron ekipin policor që të largohet nga vendi i ngjarjes. /betimiperdrejtesi.com/