Policia parandaloi një vjedhje në “KESKO-KEDS” në Suharekë, duke arrestuar të zënët në flagrancë.
Policia e Kosovës njoftoi se mbrëmë në mesnatë, një patrullë policore e Suharekës ka vërejtur persona të dyshimtë duke u munduar ta hapin me forcë derën në objektin e ”KESCO-KEDS” në Suharekë.
“Me ta vërejtur grupin prej tre personave të dyshuar, policët i kanë bllokuar hyrjet dhe daljet e objektit. Është konstatuar se të dyshuarit me vete kishin një kaçavidë të madhe dhe një levë metalike të cilat janë gjetur në duar të tyre duke u munduar ta hapin derën e zyrës,” tha zëdhënësi i Policisë Regjionale të Prizrenit, Hazir Berisha.
Policia po ashtu njoftoi se pas arrestimit dhe kontrollit detaj janë gjetur edhe një thikë, një llambë me bateri, një maskë e zezë dhe një kapuç i thellë ngjyrë e hirtë.
Gjatë verifikimit të identitetit të të dyshuarve sipas policisë, rezulton se të tre janë nga Llausha e Ulët e Podujevës dhe me dosje të shumta penale.
Pas intervistave në prani të avokatit mbrojtës është informuar prokurori i shtetit i cili ka nënshkruar vendimin për ndalimin e të dyshuarve.
“Vlen të theksohet se dy prej tyre janë të mitur. Hetuesit policorë po punojnë për zbardhjen e rasteve të tjera që dyshohet të jenë kryer nga ky grup i strukturuar e që besohet se ka mbështetje edhe nga persona tjerë. Policia ka siguruar dëshmi dhe video-incizime edhe për dy raste tjera,” tha Berisha./kallxo.com/