Projektligji për Patentë shoferi ka nxjerrë në sipërfaqe edhe një herë mospajtimet mes partnerëve të koalicionit qeverisës në seancën e djeshme të Kuvendit të Kosovës.
Deputetët kishin shumë vërejtje, sidomos për nenin 4, që kishte të bënte me dy lloj dokumentesh, një për vozitje brenda Kosovës, e një jashtë saj.
Deputeti i LDK-së, anëtar i Komisionit për Legjislacion, Armend Zemaj, tha se duhet riformulim i nenit 4 të këtij Projektligji, sepse lejon hapësirë për manipulim.
“Ajo që mungon dhe është bazike është formulimi i Amendamentit 4, që ka të bëjë me llojet e patentave të shoferëve. Ashtu siç është e përcaktuar në projektligjin në fjalë, lë hapësirë të kuptohet se shteti mund të lëshojë dy lloj patenta shoferi. Një për lëvizje brenda vendit dhe një për lëvizje jashtë vendit. Nuk ka nevojë që të jenë dy dokumente udhëtimi. Kjo është një kosto shtesë. E maltreton qytetarin dhe krijon mundësi për manipulime”, ka thënë Zemaj.
Por, për deputetin e PDK-së, Raif Çela, këto vërejtje janë të pabaza. Ai ka thënë se pavarësisht vërejtjeve të Komisionit për Legjislacion, projektligji duhet të shkojë ashtu siç është.
“Komisioni është unanim dhe mendon se duhet të mbetet kështu siç e ka propozuar Komisioni për Zhvillim Ekonomik, Infrastrukturë, Tregti dhe Industri. Dhe nuk është me bazë vërejtja e Komisionit për Legjislacion, për arsye se duhet të jetë kështu. Dokument identiteti i cili i mundëson mbajtësit të tij ta drejtojë automjetin jashtë shtetit që lëshon këtë dokument. Është një patentë shoferi e përkthyer në shumë gjuhë dhe që ka një fotografi të drejtuesit të automjetit dhe të dhëna relevante për të drejtën për drejtim”, është shprehur deputeti Çela. /Zëri/