Bashkimi është mposhtur në kryeqytet nga Sigal Prishtina me rezultat 77:88 dhe së paku deri në ndeshjen e katërt nuk dihet cila skuadër do të shpallet kampione.
Pas dy fitoreve radhazi të prizrenasve, prishtinasit kanë reaguar në ndeshjen e tretë.
Ndihmëstrajneri i Bashkimit, Ilimen Bajra, ka thënë se basketbollistët nuk u treguan shumë seriozë.
“Duket se lojtarët tanë e nënçmuan Prishtinën, ose mund të ketë ndikuar edhe lodhja. Sonte nuk arritëm të imponojmë ritmin dhe lojën tonë”, ka thënë Bajra pas ndeshjes.
Megjithatë, ai beson se në përballjen e radhës do të jetë më ndryshe. “Tani na pret ndeshja në Prizren dhe jam i sigurt se do të jetë krejt ndryshe nga ajo që treguam sot”, ka shtuar Bajra.