Jose Mourinho dhe Pep Guardiola do të takohen këtë të enjte në derbin ndërmjet Unitedit dhe Cityt në kuadër të Premier Ligës angleze.
Rivaliteti mes dy trajnerëve ishte i ashpër gjatë kohës kur ata ishin duke punuar në Spanjë. Mourinho është përkujdesur që ta ‘nxejë’ edhe derbin e kësaj të enjte.
‘The Special One’, duke dashur ta amortizojë presionin mbi ekipin e tij, tha se City është favorit për këtë ndeshje, pasi ‘ata nuk luajnë në Europë, si ne’, duke aluduar në pjesëmarrjen e United në Europa League dhe eliminimin e Cityt nga Championsi.
“Ata kanë për të luajtur vetëm një herë në javë deri në fund të sezonit, kurse ne e kemi gjysmëfinalen e Europa League, që është shumë e rëndësishme për ne”, tha Mourinho.
Derbi i Manchesterit të enjten do të fillojë nga ora 21:00 dhe do të jetë interesant, marrë për bazë që të dy ekipet janë vetëm një pikë larg njëri tjetrit në tabelën e Anglisë, duke garuar për një vend që çon në Champions League.